Lola Rosing


Sa kada tawo na hinimo san Mahal na Diyos, iba an pagpadaba san ina, iba naman an pagpadaba san lola.

Bilang pinakamagurang na apo, ako an naswertehan na makamate san pagkamoot ni Lola. Maswerte ako kay daghanon na mga panahon an naihatag niya sa ako bilang apo niya.

Batog pa san naimod niya ako sobra 40 anyos na an nakaagi, an pagpadaba niya pareho man gihapon san dati. Yoon an pagmakulog, pag-ataman, pagmangno, pag-isip kun nagkaon na o may namamatean. Yoon an paghingoha na mapakay-ad an buhay ko bilang apo niya.

Kaupod ko siya sa halos entiro na dianis na parte san buhay ko: an mga graduation sa iba iba na eskwelahan, an pagdispedir sa ako pakadto sa Seminaryo sa Sorsogon, an paghatod sa istasyon san bus pagnahale na pa Seminaryo sa Naga, hanggang sa umabot na ako maging Padi.

Di lang doon natapos an pagmakulog sin saro na Lola. Sa manlaen laen na pagtios, pagkasala, pagluya nan paghapdos, yoon siya sa pagdanon. Sa mga mata niya naimod an diri mabati na paghapot, sa puso niya namatean an diri masukol na pagdomdom.

Diri mapapara sa isip ko an manlaen laen na kagayonan na nahimo mo sa ako: an paghatod sa pag-iskwela, an pagtukdo sa ako pagtanom, pag-ani nan paglatay sa layhon, an pagsursi san loho na pantalon, an pagpadara sin bugas sa Seminaryo, an pagluto sin kinunot kun nabisita ako, asin manlaen laen pang iba.

Lola, salamat sa intero na nahimo mo. Daghanon an naidanon mo sa pagkatawo ko. Wara ako niyan na selebrasyon mo, pero sa ika 100 mo, yoon ako. Kaupod san mga pangadyi ko nan Misa mao an pagpasalamat kay hinatag ka san Mahal na Diyos sa buhay ko. Maswerte kami na nakamate san pagkamoot nan pagmakolog mo.

Aram ko ako pa man gihapon si Nonoy mo. An pinakauna na nabatian mo san ginahoy ka na Lola.

Salamat sa pagkamoot mo!




5 June 2009

1 comment:

Anonymous said...

there can never be another lola rosing sa ato magsiringaki. an nagpapangisog kun nakahirimo kita sala san mga bata pa kirita, an naghahatag sin dagdag na balon sa eskwela, an nagpapatiripon sa ato entero kada domingo sa ilawod pra sa pangalasdose, an masiramon na hinagom kun nagpapa-ani sa pasakay niya.

makamurumundo na medyo maluya na si lola ma niyan pero yoon pa man gihapon an pagmakolog sa entero.

i miss you lola ma and happy birthday saimo hali sa sayo mo man tabi na apo.

salamatonon tabi!