Abo o kalayo

Kun may abo, may kalayo.

Kalayo an pinoponan kan abo. Manlaenlaen na klase an kalayo. May kalayo kan pagkamoot, may kalayo nin pagka-uri. Igua man kalayo nin pagkasararo asin kalayo na nagbabanga.

Kaidtong panahon, paghuna kan mga tawo, an kalayo an pinakamakosog na bagay sa kinaban. Hona ninda sa kalayo nabilog an tawo, arog kan istorya ni “Malakas at Maganda.” Hona ninda, kalayo an pinoponan kan gabos.

Medyo nasala sinda. Ta an kalayo nagiging abo pag-abot kan panahon.

Kun may kalayo, may tawo.

Tawo an nagpopoon kan kalayo. Hale sa puso nin tawo an kalayo nin pagkamoot asin kalayo nin pagka-uri. Hale sa laog kan tawo an kalayo kan pagkasararo asin kalayo nin pagkabaranga.

Kaidtong panahon, hona kan tawo, siya na an pinakamakosog asin pinakamarhay sa kinaban. Mala ngani ta ginibo niyang abo an kalayo. Hona niya siya an nagbilog kan kinaban, arog baga kan istorya ni Darwin na an tawo, so boot, hale sa mga okay. Hona niya siya an pinoponan kan gabos.

Medyo nasala siya. Ta an tawo, maski ginigibong abo an kalayo, nagiging abo man pag-abot kan panahon.

Kun may tawo, may Diyos.

An Diyos an pinoponan kan tawo. Hale sa puso nin Diyos, an tawo namomoot. Hale man sa puso nin Diyos, an tawo nakikisumaro. Alagad, bakong hale saiya an tawo na mauri. Bakong hale sa Diyos an tawo na nagbabanga nin tawo.

Ngonian na panahon, naghohona an Diyos na siya an pinakamakusog asin pinakaorog sa kinaban. Mala ngani ta ipinadara Niya an Saiyang aki sa mga tawo. Hona nin Diyos, an Aki Niya an mataong kabilogan sa tawo, arog baga sa sinasabi sa Bibliya. Hona niya, an Aki niya an poponan nin gabos.

Tama an saiyang paghona. Tama Siya.

An ibang tawo nasala. An ibang tawo habo nanggad maging tama. Mala ngani ta may panahon nin Kuwaresma na arog ngonia. Tanganing maaraman giraray kan tawo an sala niya.

Aldaw nin Panguros an kapinonan kan Kuwaresma. Aldaw na kun saen kita pinapagirumdom kan abo na satuyang padudumanan, o sa Diyos na satuyang ginikanan.

Kun may abo, may kalayo. Kun may kalayo, may tawo. Kun may tawo, may Diyos.

Saen kita, sa abo o sa Diyos?

Editorial:Good News Sorsogon
17 March 1992

No comments: